Mbyllen hetimet për ngjarjen e rëndë ku mbeti i vrarë Florenc Kovaçi dhe u plagos i vëllai i tij, Mikel Kovaçi pas një sherri me 24-vjeçarin Ardit Hida.
Mësohet se Prokuroria ka dorëzuar kërkesën për gjykimin e procedimit penal për ngjarjen e muajit nëntor të një viti më parë.
“Prokuroria pranë Gjykatës së Shkallës së Parë Elbasan njofton se ditën e sotme ka depozituar në Gjykatën e Shkallës së Parë Elbasan kërkesën për gjykimin e procedimit penal nr.1695, të filluar në datën 06.11.2021, kundër të pandehurit Ardit Hida, i akuzuar për kryerjen e vepres penale të “Vrasjes në rrethana të tjera cilësuese parashikuar nga neni 79/dh i K.Penal në dëm të viktimave F.K dhe të miturit M.K. Ky procedim i referohet ngjarjes së datës 05.11.2021 ku në qytetin e Elbasanit i pandehuri Ardit Hida vrau me armë të ftohtë viktimën F.K, i cili ka gjetur vdekjen në vend dhe ka plagosur rëndë shtetasin e mitur M.K. I pandehuri është hetuar nën masën e sigurisë « Arrest në burg »” – thuhet ndër të tjera në njoftimin e Prokurorisë.
SI NDODHI NGJARJA
Sherri që përfundoi me vrasjen e Florenc Kovaçit ndodhi më 5 nëntor 2021 në Elbasan, ku shkak dyshohet të jetë bërë motra 14-vjeçare e autorit, Ardit Hida.
Ky i fundit kishte shkuar për të takuar vëllezërit Kovaçi, kjo pasi 14-vjeçarja kishte lidhje me një prej tyre, Mikel Kovaçin.
Sipas dëshmive të shumta të familjarëve dhe pretendimeve të ngritura, 14-vjeçarja konsumonte lëndë narkotike, të cilën ia siguronte Mikel Kvaçi. Ende sot nuk ka një konfirmim zyrtar mbi të gjitha këto pretendime.